
Missionerliktiń tiykarǵı maqseti – qaysıdur dindi úgit-násiyatlaw yaki qaysıdur dindi kúshsizlendiriw emes, al siz hám biz jasap turǵan jurttıń tınıshlıǵına iritki salıw hám rawajlanıwın wayran etiw bolıp esaplanadı. Tariyxtan málim, missionerler tap sol jol menen bir neshe mámleketlerdiń sociallıq hám siyasıy, ekonomikalıq hám mádeniy turmısın izden shıǵaradı. Awızbirshilikli bir xalıq hám milletti buzılıwǵa alıp kelip, olardı topar hám sektalarǵa bólip jiberdi. Áqibette xalıqtıń ásirler asa qáliplesip kelgen milliy hám diniy qádiriyatları ayaqastı bolıwına hám aqırında joǵalıp ketiwine alıp keledi. Mısalı ushın Indoneziyada háreket etken missionreler jigirma bes jıl dawamında mıńlaǵan adamlardı óz táreplerine awdırıp aldı hám áqibetinde olar jasap atırǵan Shıǵıs Timordı mámleketten ajıratıp aldı. Tap sonday ǵárezli usıl Sudan mámleketiniń batıs yaǵnıy Darfur wálayatın ajıratıp alıwda da qollanılǵan.
Bunday háreketler menen olar islam dinine iseniwshi máhálliy xalıq ortasında ózleri haqqında unamlı pikirler tuwdırıwǵa erisedi. Bul jolda arnayı Islam húkimlerin buzıp kórsetiw, Qurani káriym ayatların bir-birine qarama-qarsı qoyıw, Payǵambarımız sallallahu alayhi wa sallam hádislerin nadurıs sholıw sıyaqlı usıllardan paydalanadı. Ashınarlısı kóp adamlardıń itibarsızlıǵı, biyparqlıǵı olardıń jaman niyetlerin ámelge asırıwda qolaylı bolmaqta.
Missionerler jaman niyetlerin ámelge asırıwda ǵalaba xabar hám baylanıs qurallarınan, atap aytqanda sociallıq tarmaqlardan da keń paydalanbaqta. Missionerlik ideyaların úgit-násiyatlawshı sociallıq tarmaqlarda kanallar ashılıp, xalıqımızdıń mıń jıllardan beri isenip kelgen muqaddes dinimizdi buzıp kórsetiw arqalı, ózleriniń jasırın qılmısların ámelge asırıp atır. Qalaberdi, olar broshuralar, jurnallar hám tekstlerdi ana tilimizge awdarma qılıp, xalıq ortasında biypul tarqatadı. Sputnikler arqalı uzatılatuǵın onlaǵan televidenie kórsetiwleri, radio kanalları, internet saytları arqalı keń úgit-násiyatlaw isleri alıp barılıwı nátiyjesinde dúnya júzinde missionerlik háreketleri keń jayılmaqta.
Ayrım adamlar dáramat tabıw maqsetinde óz kindik qanı tamǵan elden uzaqlasıp, alıs hám biytanıs ellerge barmaqta. Olardıń kópshiligi mine usı missionerlerdiń duzaǵına túsip atır. Basqa itiqad, basqa mentalitet wákilleri arsında jasaǵan jaslarımız óz milliy mánáwiyatlarınan úzilip, ózgelerdiń ruwxıy-mánáwiy tásirine túsip qalmaqta. Ele iyman-itiqadı qáliplesip úlgermegen jaslardı bunday buzıq ideyalardan saqlaw – búgingi kúnimizdiń eń áhmiyetli máselelerinen biri esaplanadı.
Aydos Yakupov
Nókis "Muhammad ibn Ahmad al-Beruniy" orta arnawlı islam bilim jurtı oqıtıwshısı