Ассалаўма алейкум

ѲЗБЕКСТАН МУСЫЛМАНЛАРЫ БАСҚАРМАСЫ

“МУҲАММАД ИБН АҲМАД АЛ-БЕРУНИЙ”

орта арнаўлы ислам билим журтының рәсмий веб-сайтына хош келдиңиз

Елимизде Ғәрезсизлигимиз шарапаты менен зия ҳәм мәрипат ошағы болған мешит ҳәм медреселер өз жумысын баслап, халқымыздың руўхый тәрептен болған мүтәжликлерине мүнәсиб тәризде хызмет етип киятыр. ...

Муфтий ҳазретлериниӊ басшылығында Мойнақта Истисқа намазы оқылды

41
19 Ноябрь 2018

Усы жылдыӊ 15-16-ноябрь күнлери Президентимиздиӊ Қарақалпақстанға сапары даўамында берген тапсырмаларыныӊ орынланыўын тәмийинлеў мақсетинде, елимизде хызмет сапары менен жүрген Өзбекстан мусылманлары басқармасы баслығы, муфтий Усмонхон Алимов 18 ноябрь күни Мойнақ районына барды.

Мойнақ елимиздиң ең арқа аймағы есапланады. Бул жерде 30 мыңнан аслам халық жасайды. Мийнетке жарамлы болған адамлардың көпшилиги өндирис, хызмет көрсетиў, саўда, аўыл хожалығы ҳәм басқа тараўларда бәнт.

Соңғы жыллары аймақтағы экологиялық жағдайды жақсылаў, халықты таза ишимлик суўы менен тәмийинлеў, жаңа жумыс орынларын ашыў бойынша орынланған анық, мәнзилли илажлар нәтийжесинде адамлардың турмыс дәрежеси сезилерли түрде жоқарылады.

Муфтий ҳәзретлери Мойнақ районындағы “Атаў”, “Жайҳун”, “Толлы-өзек”, “Мойнақ”, “Дослық” мәҳеллелери ҳәм “Үш-сай”, “Модели”, “Тик-өзек”, “Бозатаў” аўыллары халқы менен ушрасып, дийдар сәўбетлести. Ушрасыў даўамында муфтий ҳәзретлери жергиликли халықтыӊ сабыр-тақаты, мийнеткешлигиниӊ даўамлы болыўын тилеп, бүгинги күнде мәмлекетимиз Басшысы басламасы менен Мойнақ районында әмелге асырылып атырған өзгерислердиң мазмун-мәниси ҳаққында халқымызға кеӊ түсиниклер берилди. Соның менен бирге, муфтий ҳәзретлери ислам дининиң түп мәнисин сақлаған ҳалда аймақларда садақа-дәстүрлерди динимиздеги көрсетпелер бойынша өткериў кереклиги хаққында айрықша тоқталып өтти.

Сапар даўамында райондағы “Ҳәким ата” қойымшылығын зыярат етип, ол жерде Қуран карийм аятларынан оқып, саўабы мархумлардыӊ руўхларына бағышланды.

Муфтий Усмонхон Алимов ҳәзретлери Мойнақ районының ең шетки аймағында жайласқан “Кемелер қәбиристаны”на барды. Бул жерде Аллаҳ тааладан халқымызға молшылық, берекет, соныӊ менен бирге Арал теӊизине суў қайтыўын тилеп нураный аталарымыз менен бирге истисқа намазы оқылып, қайырлы дуўалар қылды. Усы орында истисқа намазы ҳаққында айтып өтсек, қурғақшылық болып атырған ўақты Аллаҳ тааладан суў-жаўын сорап, оқылатуғын еки ракатлы намазды Истисқа деп аталады. Ҳәзрети Пайғамбарымыз алейҳисалам суўсызлық ўақтында қублаға жүзленип дуўа қылған, соӊ имам болып еки ракат намаз оқығанлығы хаққында рәўият етилген. Истисқа намазын оқыў ушын қаладан тысқарыға, саҳра жерлерге шығыў да Пайғамбарымыз қылған ислердиӊ бири. Бул намазда нураный ақсақалларымыздыӊ қатнасыўы болса, өзгеше пайызға бөленди.

Аллаҳ таала бул қылған ибадатларды ҳәмде қайырлы дуўаларды өз дәргайында қабыл етип, Елимизге өзиниӊ берекет жаўдырып, халқымызға мол несийбе инәм ете берсин.


  • Автор: Админ
  • 19 Ноябрь 2018
  • 0
  • 1122

Жеке пикир

Ҳикметлер гүлдәстеси