Ассалаўма алейкум

ѲЗБЕКСТАН МУСЫЛМАНЛАРЫ БАСҚАРМАСЫ

“МУҲАММАД ИБН АҲМАД АЛ-БЕРУНИЙ”

орта арнаўлы ислам билим журтының рәсмий веб-сайтына хош келдиңиз

Елимизде Ғәрезсизлигимиз шарапаты менен зия ҳәм мәрипат ошағы болған мешит ҳәм медреселер өз жумысын баслап, халқымыздың руўхый тәрептен болған мүтәжликлерине мүнәсиб тәризде хызмет етип киятыр. ...

Тынышлық ҳәм аманлық дини

276
14 Октябрь 2020

Халқымыз әзел-әзелден тынышлықты қадирлеп келген ҳәм өзиниң бәрше жақсы нийетлериниң, уллы мақсет-тилеклериниң әмелге асыўында тынышлықтың орны гиреўли екенин терең аңлаған. Сонлықтан да, жасы үлкен аталарымыз, апаларымыз пәтия-тилеклеринде ең биринши рет Жаратқаннан тынышлық-аманлық сорайды. Мине усындай тилеклер, дуўалар нәтийжесинде бүгинге келип ўатанымызда тынышлық ҳүким сүрип, ҳәр тәреплеме жылдам раўажланыў жолында ҳәрекет етпекте. Халқымыз абад ҳәм парахат турмыс кеширмекте десек асыра айтқан болмаймыз.

Әлбетте, бул күнлерге аңсатлық пенен жетип келмедик. Буның ҳаммеси ата-бабаларымыздың шеккен қыйыншылықларының мийўеси есапланады. Қалаберди, президентимиз тәрепинен халқымыздың тыныш ҳәм парахат турмыс кешириўине қаратылған пәрман ҳәм қарарлары бүгинги тыныш ҳәм аманлықтағы өмиримиздиң негизин тәмийнлейди.

Бәрше динлерде болғаны сыяқлы, муқаддес динимизде де тынышлық ҳәм аманлық, гөззаллық ҳәм татыўлық айрықша орын тутады. Бул ҳаққында Аллаҳ таала Өз каламында:

«Ҳәй Мөминлер! Тынышлыққа толығы менен кириң, шайтан жолларына ергеспең! Себеби, ол (шайтан) сизлерге ашық душпан», - деп марҳамат қылады.

Бул аяттағы «тынышлыққа толығы менен кириң» деген буйрық - бир-бириңиз бенен татыў болың, тынышлықтың қәдирине жетиң, оның шүкирин меңгерин деген мәниде келеди.

Сондай-ақ, мусулманлар менен өз-ара татыў болыў менен бир қатарда басқа дин ўәкиллери менен де кеңпейилликте, аўызбиршиликте өмир кешириўге шақырық болып табылады. Мине усы мәниде Аллаҳ таала және бир аятында:

«Егерде, тынышлыққа ҳәрекет етсе, сен де оған (тынышлыққа) ҳәрекет ет ҳәм Аллаҳға тәўекел қыл!», - дейди.

Тынышлық уллы немат екенлигин, оны асыраў ҳәм оған шүкирлик қылыў зәрүр екенлигин айтып, Аллаҳ таала Қураны кариймде:

«Мине усы үйдиң (Кабаның) Роббисине ибадат қылсын! Себеби, (Ол Аллаҳ) оларды ашлықтан (қутқарып) тойдырды ҳәм қәўиптентыныш қылды», - деп айтады.

Аллаҳ таала өзиниң бенделерине ең уллы немат, тынышлық ҳәм аманлықты бергенин ҳәм буның ушын ибадат етип, шүкирлик қылыўын буйырмақта. Егерде бул уллы нематтың қәдирине жетпестен нәшүкирлик қылып, ҳәдден асқан, жер жүзинде тынышлықты бузып, бузғыншылық қылғанларға Аллаҳ таала ескертип айтады:

«Ҳәм бурылып кеткенде, жер жүзинде бузғыншылық ушын ҳәмде егин ҳәм нәсилди набыт қылыў ушын ҳәрекет етеди. Ал, Аллаҳ болса бузғыншылықты жақсы көрмейди»

Сондай екен, Аллаҳ таалаға хош келмейтуғын ислер менен шуғылланыўшы болыўдан сақланыў зәрүр.

журтбасшымыз тынышлықтың бүгинги турмысымыз ушын әҳмийетин төмендегише тәрийплейди: «Биз – Шығыс перзентлеримиз. Шығыс мәмлекетлериниң қай жерине бармаң, адамлар бир-бири менен ушырасқанда, ең алдын, «Ассаламу алайкум!» дейди. Бул сөз арабшадан алынған болып, «Сизге тынышлық яр болсын!», деген мәнини аңлатыўын жақсы билесизлер. «Сәлем», яғный «тынышлық» сөзи Қураны кариймде 40 мәрте ушырар екен. Бул муқаддес китаптың аятларынан биринде былай делинеди: «Мийирман Аллаҳ таала тәрепинен адамларға алғыс мәнисинде «тынышлық» сөзи айтылады»

Мине усындай биз тынышлықты қәдирлеген, оны асырап абайлаған халық перзентлеримиз. Сондай-ақ, тынышлықты, дүняны абад қылыўды бирлемши ўазыйпа қылып белгилеп қойған, ҳәм оған шүкирлик етиўди, оның даўамый болыўында тынымсыз ҳәрекетте болыўды буйырған дин ўәкиллеримиз. Сондай екен, Журтымыз тынышлығы, халқымыз парахатшылығы жолында хизмет қылыў ҳар биримиздиң ўазыйпамыз саналады.

Нѳкис Муҳаммад ибн Аҳмад ал Беруний орта арнаўлы ислам билим журты оқытыўшысы Ж.Искендеров


  • Автор: Админ
  • 14 Октябрь 2020
  • 0
  • 24

Жеке пикир

Ҳикметлер гүлдәстеси