Ассалаўма алейкум

ѲЗБЕКСТАН МУСЫЛМАНЛАРЫ БАСҚАРМАСЫ

“МУҲАММАД ИБН АҲМАД АЛ-БЕРУНИЙ”

орта арнаўлы ислам билим журтының рәсмий веб-сайтына хош келдиңиз

Елимизде Ғәрезсизлигимиз шарапаты менен зия ҳәм мәрипат ошағы болған мешит ҳәм медреселер өз жумысын баслап, халқымыздың руўхый тәрептен болған мүтәжликлерине мүнәсиб тәризде хызмет етип киятыр. ...

Медресе ҳаққында

24 Июль 2018

Елимизде Ғәрезсизлигимиз шарапаты менен зия ҳәм мәрипат ошағы болған мешит ҳәм медреселер өз жумысын баслап, халқымыздың руўхый тәрептен болған мүтәжликлерине мүнәсиб тәризде хызмет етип киятыр. Атап айтқанда Қарақалпақстан Республикасы Нөкис қаласындағы Муҳаммад ибн Аҳмад ал-Беруний орта арнаўлы ислам билим журты 1992-жылы өзиниң тәлим-тәрбиялық жумысын баслады. Бул билим журтына Қарақалпақстан диярының (ҳәзирги Беруний районы) аймағында 973-1048-жыллары туўылып ҳәм жасап өткен уллы данышпан, ойшыл, бир жүз алпыстан артық жоқары илимий мазмундағы қунлы мийрасларын қалдырған, қалаберсе, жердиң шар формасында екенлигин биринши болып дәлиллеген илимпаз-алым Муҳаммад ибн Аҳмад ал-Берунийдиң берилген.

Билим журты дәслеп Нөкис қаласындағы “Имам ийшан Муҳаммад” жоме мешити имаратында өз жумысын алып барды. 2008-жылға келип жаңа 4 қабатлы (ески Троллейбус ДЕПОсының басармасы) имаратының 3-4-қабатларына көшип өтти ҳәм 2013-жылы 9-январьда Қарақалпақстан Республикасы Министрлер Кеңесиниң Мәжилислер залында “Ким зыят” саўдасына билим журты директоры Ш. Баўатдинов қатнасып, 2013-жыл 30-январьда дүзилген РК-8 санлы шәртнамаға муўапық бул бина толығы менен медресе балансына өткерилди. Усы таза бинаны заман талапларына сай реконструкциялаў мақсетинде 2013-2014-жыллары билим журты дирекциясы тәрепинен бир қанша унамлы ислер әмелге асырылды.

Ҳәзирги ўақытта билим журтында 117 талабаға 29 (илим докторлары, профессорлар ҳәм илим кандидатлары, доцентлер және) толық жоқары мағлыўматлы тәжирийбели мударрислер, оқытыўшы-устазлар тәрепинендәўир талапларына сай үскенеленген, барлық шараятлар менен тәмийинленген бөлмелеринде, оқыў мәмлекетлик билимлендириў стандартлары тийкарында арнаўлы пәнлер менен бир қатарда улыўма билим бериў пәнлеринен алдыңғы педагогикалық технологияларға сай тәлим-тәрбия ислери мақсетке муўапық алып барылмақта. Электрон сабақлықлар ҳәм алдыңғы педагогикалық технологиялар тийкарында дөретилген оқыў-қолланбалары талабалардың пайдаланыўы ушын заманагөй компьютерлер менен тәмийинленген Мәлимлеме ресурс орайында көплеген сабақлықлар, хрестоматиялар ҳәм көркем әдебий китаплар менен бирге жәмленген.

2015-жыл 23-декабрьдеги Өзбекстан Мусылманлары Басқармасы қурамындағы Ташкент ислам институты ҳәм орта арнаўлы ислам билим журтлары басшыларының семинар баяны қарарының“Улыўма билим бериў пәнлери блогының “Химия”, “Физика” ҳәм “Биология”пәнлерин билимлендириў стандартына муўапық оқытыў” мақсетинде барлық әсбап-үскенелерди өзинде жәмлеген арнаўлы лаборатория бөлмелери шөлкемлестирилди.

Мине усы жаратылып берилген имканиятлардан талабаларымыз да өнимли және нәтийжели пайдаланып келмекте. Солардан, билим журтын 2008-жылы питкерген талаба Жўрабек Ишаев пәнлер бойынша өткерилген “Ягона олимпиада” жеңимпазы болып, Имам Бухарый атындағы Ташкент ислам институтына имтиҳансыз, грант тийкарында оқыўға қабыл етилди ҳәм бул ислам институтын табыслы тамамлап, ҳәзирги ўақытта ол усы орта арнаўлы ислам билим журтында мударрис болып ислеп келмекте.

2011-жылы Өзбекстан мусылманлары басқармасы тәрепинен өткерилген XXII Республикалық Қарыйлар жарысында Екинши дәрежели диплом менен сыйлықланған билим журты талабасы Й. Нураддинов 2013-жылда Кувейт мәмлекетинде өткерилген пүткилжәҳәнҚарыйлар жарысында Биринши онлықта сыйлы жетинши орынды ийелеп, Республикамыздағы диний тәлимге болған дыққаттың нәтийжесиниң сапалы екенлигин көрсете алды.

Билим журты талабасы В. Қўзиев 2012-жылы XXIII Республикалық Қарыйлар жарысының жуўмақлаўшы басқышында Екинши дәрежели дипломы, 2013-жылы талаба А. Мавланов XXIV Республикалық Қарыйлар жарысының Үшинши дәрежели дипломы менен сыйлықланған болса, "Қарыйлар жарысы-2017" таңлаўында Н. Пирхонов “Мужаввид Қарыйлар жөнелиси” бойынша сыйлы Екинши орынды ийеледи.

Журтбасымыздың басламасы менен өткерилген "Өзбекстан Қуран жарысы—2018" таңлаўының Республикалық басқышы Қарақалпақстан Республикасының ўәкиллери ушын жүдә табыслы болды. Соның ишинде, билим журтымыздың питкериўши талабасы Й. Нураддинов Жоқары дәрежели жеңимпаз сыпатында Президентимиз саўғасы болған “Ласетти” автомобили менен сыйлықланды.

Ал усы жарыстың 18-25 жастағы қатнасыўшылары ортасында “Тилаўат” жөнелиси бойынша және бир билим журтымызды питкерген шәкиртимиз Н. Әметниязов Үшинши орынды, диний тәлим мәкемелериниң талабалары ортасында “Тилаўат” жөнелиси бойынша билим журтының 1-курс талабасы Ҳ. Ҳикматуллаев Екинши орынды қолға киргизди.

2016-жылы диний билим журтлары талабалары арасында ҳәр жылы өткерилип келинетуғын “Ягона олимпияда” таңлаўында билим журтының 4-басқыш талабасы И. Аллаяров сыйлы Үшинши орынды ийелеўге мияссар болды.

Өзбекстан мусылманлары басқармасы қурамындағы Ташкент ислам институты ҳәм орта арнаўлы ислам билим журтлары арасында өткерилип киятырған “Биз жаслар-жат идеяларға қарсымыз” интеллектуал беллесиўи 2016-жылдың апрель айында Нөкисте өткерилип, онда билим журтының “Беруний әўладлары” командасы сыйлы Екинши орынды ийелеўге миясар болған болса, 2017-жылы Ташкент қаласында өткерилген "Биз жаслар-жат идеяларға қарсымыз" интеллектуал беллесиўинде билим журты командасы сыйлы Биринши орынды ийеледи.

Талабаларымыз Өзбекстан мусылманлары басқармасы тәрепинен өткерилетуғын “Баркамал әўлад” спорт жарысларына белсенди қатнасып келмекте.

2013-жылы Бухара уалаятындағы Мир-Араб медресесинде өткерилген “Баркамал әўлад” спорт жарысларында спорттың стол тенниси бойынша А.Жиемуратов Үшинши орынды ийеледи.

“Баркамал әўлад-2015” спорт жарысларының жуўмақлаўшы басқышында спорттың тас көтериў түри бойынша билим журтының талабасы Р.Тилеўбаев сыйлы Биринши орынды жеңип алды.

Ал "Баркамал әўлад-2017" спорт жарысында билим журты талабалары

1.И.Әметниязов спорттың “Стол тениси” түри бойынша сыйлы Биринши орын

2.Б.Мырзабаев спорттың “Миллий гүрес” түри бойынша сыйлы Екинши орын

3.Р.Тилеубаев спорттың “Тас көтериў” түри бойынша сыйлы Екинши орын

4.Т.Низаматдинов спорттың “Шахмат” түри бойынша сыйлы Үшинши орын ийелеген болса, билим журтымыздың спортшы жасларыкомандалық есапта сыйлы Биринши орынды жеңип алыўға миясар болды.

Билим журтын питкерген талабаларға “Динтаныўшы” кәсиби, “Имам-хатиб”, “Басланғыш араб-тили оқытыўшысы”, “Әдепнама тәрбияшысы, диний руўҳый-ағартыўшылық тәрбия мәселелери бойынша мәсләҳәтши” қәнигеликлери берилип, ҳәзирги күнде питкериўшилеримиздиң басым көпшилиги өз маманлығы бойынша жумыс ислеп келмекте.

Сондай-ақ бул билим журтын питкерген талабалардан айрымлары Өзбекстан Республикасы Министрлер Кабинетиниң 2003-жылы 22-августдағы ПҚ 364-санлы қарары тийкарында жоқары оқыў орынларында оқыўын даўам еттирмекте.


  • Автор: Админ
  • 24 Июль 2018
  • 17
  • 2307

Жеке пикир

Ҳикметлер гүлдәстеси